CEBU, Philippines - Usa ka three-pointer ang gipasud ni Ranidel De Ocampo sa katapusang 41 segundos aron luwason ang Smart Gilas Pilipinas, 71-70 batok sa Jordan aron haruson ang tanan nilang duwa sa Group B sa FIBA Asia Cup gabii didto sa Wuhan, China.
Ang Gilas mangandam sa laing hagit sa sunod round diin nagpaabot ang ubang Asian powerhouse nga Iran ug China.
Dili hinuon sayon ang kadaugan sa Gilas tungod kay diriyot sila madisgrasya batok sa Jordan ubos ni Serbian Rajko Toroman.
Kun kahinumduman, si Toroman maoy coach kaniadto sa Smart Gilas ug nahimo usab siyang coach sa Barako Bull sa PBA.
Ang Jordan naglabaw og tres puntos, 60-57 pagsud sa fourth period, apan nanginit si Paul Lee diin siya ang miduslit sa 9-2 rally aron hatagan ang Gilas og 66-62 nga bentaha.
Mibawos sab hinuon ang Jordan pinaagi sa puntos ni Rasheim Wright aron tablahon ang iskor, 68-all sa katapusang 51 segundos, apan wala nila mabantayi si De Ocampo nga bakante kaayo alang sa iyang winning-shot.
Nakaangkon pa og katapusang higayon ang Jordan pag-ilog sa daog, apan mikagar ang buzzer-beating three ni Wesam Al-Sous nga maoy mikandado sa daog sa Gilas.
Sa makausa pa, si Lee na usab ang topscorer sa Gilas pinaagi sa iyang 16 puntos, samtang si De Ocampo adunay 14 ug ang naturalized center nga si Marcus Douthit mitampo'g 13 puntos. (BANAT NEWS)