CEBU, Philippines - Gipanghimakak ni boxing ug basketball promoter Lorenzo 'Chao' Sy nga andam nang mopailawom sa RP Team boxing training pool si Amateur Boxing Association of the Philippines (ABAP) gold medalist Junrel Jimenez, ang pambato sa Team Cebu ubos sa Cebu City Sports Commission (CCSC).
Matud pa ni Sy nga dili mahitabong mobiya si Jimenez sa CCSC ning sayong bahin sa iyang career tungod kay nagkasabot na silang duha nga unahon una'g tiwas ni Jimenez ang iyang pagtungha sa kolehiyo sa wala pa kini mosalmot sa ABAP nga bag-o lang natapos didto sa Digos City, Davao del Sur.
Si Jimenez uban sa duha ka laing boksidor sa CCSC nga silang Kit Geron Garces ug Jeorge Edusma, midaog sab og gold medals didto sa Digos.
Ang 20-anyos nga si Jimenez mokuha'g kurso nga Hotel and Restaurant Management diha sa Southwestern University (SWU).
Human sa iyang kadaugan didto sa Digos, gikumbensir dayon si Jimenez nga mokuyog sa Manila aron mag-training ubos sa RP boxing team, apan mibalibad kini.
Napanglantawan ni Sy nga si Jimenez mahimong usa sa labing maayong boksidor dinhi sa Sugbu. (BANAT NEWS)