CEBU, Philippines - Ang Sugbuanong seklista nga si John Renee Mier maoy milangkat sa premiere class A title sa 1st Divine Mercy Chapel Mountainbike Circuit Race sa miaging adlaw didto sa Sitio Ada sa Awihao, dakbayan sa Toledo.
Gilupig ni Mier ang laing banggiitang si Warren Vinan alang sa korona, samtang si Roy Carbonera nahimutang sa ikatulo.
Si Ramonito Espinosa maoy labing paspas sa class B. Mi-okupar sa ikaduha ug ikatulo mao silang Kit Cabonita ug Ryke Armas.
Sa category C, si Junar Pamplona maoy mipahiluna sa kinatumyang dapit, gisundan nilang Gian Carlo Batac ug Ike Cabarles alang sa ikaduha ug ikatulong dapit. Sila si Jim Siegue ug Daniel Calipay maoy mikompleto sa top five.
Si Francis Hernando mipilde ni Carlo Jan Cabonita aron dag-on ang special event, samtang si Just Fernandez midominar sa all-Toledo action ning usa ka adlaw nga lumba nga gipasiugdahan sa Toledo On-Road Cycling Club uban sa Divine Mercy Chapel. (BANAT NEWS)