CEBU, Philippines - Andam ang mga players sa Rain or Shine Elasto Painters nga sumpuon ang tinguha sa San Mig Coffee Mixers nga mukulit og kasaysayan pinaagi sa pagsakmit nila og ‘three-peat’ championship sa PBA Governors’ Cup finals.
Ang San Mig maninguha nga mokampiyon alang sa ikalimang three-peat championship sa kasaysayan sa liga.
Apan ang Rain or Shine nga miabante sa finals human sa ilang kadaugan batok sa Alaska Aces, di magpanuko nga papason ang damgo sa San Mig.
Sugdan ang Game-1 sa ilang best-of-seven finals series sa Martes didto sa Smart Araneta Coliseum.
Ang sentro sa Rain or Shine nga si Beau Belga nagkanayon nga daku sila og kompiyansa nga mapilde ang San Mig bisan pa og kini ang inilog nga mudaog sa serye.
Inay grandslam, si Belga miingon nga mas desidido sila nga musugod og kaugalingon nilang dinastiya pinaagi sa pagsakmit sa Gov Cup title.
“Ang sabi lang naman sa amin ni coach Yeng Guiao, 'Huwag nating isipin na pigilan yung grand slam but to make our own run for the championship,'” matud pa ni Belga sa Spin.ph.
Nasayud si Belga nga dili sayun ang ilang atubangon ilabi na nga naa sa San Mig ang reigning ‘Best Import’ nga si Marqus Blakely, apan andam na ilang depensa batok sa American player.
Bisan pa og injured ang usa ka bigman ug Cebuano nga si JR Quiñahan, kompiyansa si Belga sa frontcourt ug salig usab siya sa ilang import nga si Arizona Reid. (BANAT PALARO)