CEBU, Philippines - Gisugdan sa University of San Carlos (USC) ang ilang kampanya sa BEST SBP Passerelle Twin Tournament 2014 Cebu Leg pinaagi sa makabungog nga kadaugan batok sa University of San Jose-Recoletos (USJ-R), 75-15 didto sa Lex Oriens gym sa Sacred Heart-Ateneo de Cebu sa Mandaue City.
Sa laing duwa, ang SHS-Ateneo midaog batok sa Don Bosco Technology Center sa iskor nga 58-15, midaog sab ang University of the Visayas (UV) batok sa Southwestern University (SWU), 62-20 ug ang Cebu Eastern College (CEC) mipilde sa University of Southern Philippines-Foundation (USP-F) sa iskor nga 49-36.
Silang Joseph Fontanosa ug Louisse Sevilla parehong miposa og 10 puntos alang sa USC, samtang silang Lucky Orongan ug Zyuann Jhute Balsamo adunay tres puntos matag usa alang sa USJ-R ubos sa Group A division.
Sa laing bahin, si Ryan Tecson maoy nangu sa CEC sa iyang 11 puntos, samtang ang USPF gipangulohan ni Vince Obales sa iyang 19 puntos ubos gihapon sa Group A.
Sa Group B, si Lyder Canieso maoy nangu sa opensa sa SHS-Ateneo sa iyang 12 puntos ug ang napildeng DBTC gipangulohan ni Rae Adrian Duque nga adunay siyete puntos.
Gipangulohan sab ni Kyle Campollo ang UV human moposa'g 12 puntos, samtang si Dave Rosales mao sab ang topscorer sa napildeng SWU sa iyang sayes puntos. (BANAT NEWS)