Pagara bros. imporsibo

CEBU, Philippines -  Pulos gituman sa managsuong Jason ug Albert Pagara ang ilang saad nga mohimo og impresibong kadaugan sa ‘Pinoy Pride 26: Fists of the Future’ niadtong miaging Sabado sa gabii didto sa Pacific grand ballroom of  Waterfront-Cebu City Hotel and Casino.

Gisemento ni  Jason ‘El Niño’ Pagara (34-2, 21KOs) ang iyang estado isip usa sa mga top prospects sa 140 lbs. division human niya gipukan sa fourth round si Mario ‘Rocky’ Meraz (20-4, 16KOs) aron panalipdan iyang WBO International light welterweight title.  Samtang ang iyang manghud nga si ‘Prince’ Albert (21-0, 15KOs) nanginahanglan lang og 78 segundos aron tumbahon si Hugo ‘Olimpico’ Partida (21-5, 16KOs) aron masakmit ang bakanteng IBF Intercontinental junior featherweight belt.  Agresibo nga gisugdan ni Pagara ang away diin milusad dayun siya og atake diin napatumba niya sa first round si Meraz. Hinuon daling nakarekober ang Mehikano ug misukol diin nakapasud siya og mga limpyong kombinasyon ngadto ni Pagara sa third round.  Human makita nga misuway na pagkontrolar sa tempo sa away ang Mehikano, si Pagara daling mibalik sa iyang atake ug  milampos siya pagduso ni Meraz sa pisi sa wala pa siya mipauwan og kumo nga subling mipahagsa sa Mexican. Mibarug si Meraz, apan wala na tugti ni referee Danrex Tapdasan nga magpadayun ang away sa 2:59 sa fourth round tungod usab sa iyang pagtuo nga sobra na sa kastigo ang nasinati sa Mehikano.

“Lig-on gyud siya (Meraz) kay nakaya niya akong mga kumo,” matud pa ni Pagara. “Hinaot nga human sa akong daog makakuha nako og dagkung away. Gusto ko moaway og mga sikat sa akong dibisyon pareha ni Brandon Rios.”

Sa iyang bahin, si Albert kaduha mipatumba ni Partida, sa wala pa niya hingpit nga gitapos ang Mehikano gamit ang usa ka bangis nga hook-straight combination sa 1:18 sa unang round.  Si ALA Promotions President ug CEO Michael Aldeguer mibilib sa gipakita sa managsuon ug mibutyag nga ipadala niya ang duha sa Estados Unidos aron mopailawum sa training.  Sa undercards, ang kanhi two-time world title challenger  nga si AJ ‘Bazooka’ Banal (31-2, 22KOs) mipaundang ni  Indonesian Defry ‘Hammer’ Palulu (10-1, 9KOs) sa second round, samtang ang sangka ni  Jimrex Jaca (39-7-4,  22KOs) ug Japanese Masayoshi Kotake (9-8-1, 5KOs) miresulta  sa draw human  giundang ang away sa third round tungod sa grabeng gisi sa  kilay ni Jaca tungod  sa headbutt. (BANAT NEWS)