ASEAN Mountainbike Series mosikad na sa Danao

CEBU, Philippines - Manalipod na ang mga tang-ang mountainbikers sa ilang balwarte batok sa mga langyaw'ng karibal sa kick-off leg sa ASEAN Mountainbike Cup  Series karong adlawa didto sa Manlayag-Patag sa dakbayan sa Danao sa amihanang bahin sa Sugbu.

Lakip sa modepensa sa ilang tugkaran mao ang Philippine National Games (PNG) top performers

nga silang Niño Surban, March MacQuinn

Aleonar ug Alvin Benosa uban nilang  Edwin Nacario Jr. ug Leopoldo Japitana sa men's elite division.

Sukdon sa mga Pinoy ang abilidad nilang Tay Chin Seng ug Tan Hong Chu sa Singapore, Lars Droste sa Germany, Bandi Sugito ug Chandra Rafsnazani sa Indonesia ug Daniel Frisco sa Malaysia.

Sa pikas bahin, ang  lumad nga taga-Iloilo nga si Mellisa Jane Jaroda  mohimo sa una niyang internasyonal nga lumba uban nilang Avegail Rombaon ubos sa elite division.

Magpaabot sila og dakung hagit batok nilang Kusmawati Yazid ug Wilhelmina sa Indonesia ug Natahsya Soon ug Queenelisi Ligadu sa Malaysia.

Ang mga Sugbuanong riders nga sila si John Rene Mier, Luis Miguel Maximo ug Warren Vinan ang mopakita sab sa ilang katakus sa men's open.

Gawas sa elite ug

open division, daghan sab nga mga kategoriya ug tigian sa cross-country event.

Sa downhill event, ang nasudnong koponan pangulohan  sa beteranong si  Joey Barba ug sa ig-agaw niining si  Barba Jr.

Gawas sa mga ganting salapi ug medalya, ang riders  magtigi sab alang

sa puntos nga kinahanglan sa ilang bangga alang sa overall supremacy ning  duha ka hugna nga kompetisyon.

Ang kalihukan gipaluyohan sa probinsiya sa Sugbu pangulohan

ni Governor Hilario Davide, Vice Governor Agnes Magpale, Provincial Board Members Jude Sybico, Miguel Magpale ug Ivy Durano-Meca, Shimano, Cube Cycles, Smart, Rudy Project, Endurace, Air 21, ASAP Advertising, Ayala Center Cebu, YKK Trading, Bikeology, Prince Warehouse, The Brick, CycleLogic, Congressman Ace Durano, Danao City Mayor Ramonito D. Durano III ug Vice Mayor Red Durano. (BANAT NEWS)