CEBU, Philippines - Nanghawod ang dakbayan sa Lapu-Lapu sa natad sa arnis ug sa running sa Philippine National Games (PNG) nga bag-o lang nahuman didto sa kaulohan.
Ang Lapu-Lapu nakakuha'g usa ka gold, unom ka silver ug lima ka bronze medals sa duha sa lima ka events nga gisalmotan niini.
Si Jonel Pepito sa Pajo National High School maoy mitunol og bulawan pinaagi sa full contact labanan heavyweight division.
Midaog og silvers alang sa Lapu-Lapu mao sila si Veronica Apa sa featherweight labanan division, Ivie Camangyan sa bantamweight single baston competition, Julia Broce sa lightweight single baston division, Gemmarie Rosales sa bantamweight syncronize single baston.
Ang bronze medals nakuha nila ni Jakielou Bulanon sa Marigondon National High School (flyweight) ug ang mga tinun-an gikan sa Pajo National High School nga silang Rexmar Baldos (flyweight) ug Ivie Camangyan (bantamweight).
Sa athletics, si Lovely Fe Andrin midaog og silver sa 3000m run, samtang si Kara Cosep nakaangkon og bronze medal sa 3000 steeplechase. Ang duha pulos nagtungha sa Pajo NHS.
Daku ang kalipay ni Mayor Paz Radaza sa naangkon nga kadaugan sa mga atleta sa Lapu-Lapu nga misalmot sa PNG sa labing unang higayon.
Misaad si Radaza nga iyang hatagan og mga bag-ong kagamitan ang mga atleta aron makabansay-bansay kini sa sayong panahon.
Pasidunggan usab ni Radaza ang mga atleta nga midaog og medalya lakip na ang cash incentive gikan sa kaban sa siyudad. (BANAT PALARO)