CEBU, Philippines - Mabungahon ang kampanya sa Sugbuanang tennis player nga si Shyne Villareal human siya modaog og tulo ka titulo atol sa Baybay city leg sa Cebuana Lhuillier Age-Group Tennis Circuit.
Nanghawod si Villareal sa girls 16 ug 18 singles ug ingon man sa double event uban sa laing Sugbuana nga si Elgy Dasian.
Nakuha niya ang makutas nga kadaugan, 6-4, 6-3 batok sa garbo sa Cagayan nga si Gennifer Lysandra Pagente sa girls 16-under finals, apan yano kaayo siyang midaog sa 18-under class batok ni Joy Camille Sanico sa Isabel, Leyte, 6-2, 6-1.
Si Villareal naka-gold sab dihang nakigpares siya kang Dasian sa ilang pagdaog batok sa tandem nilang Jeminah Jabines ug Cindy Yap sa doubles event, 6-4, 6-4. (BANAT PALARO)