San Beda batok UST sa Leyte

CEBU, Philippines - Usa ka dakung torneyo sa basketbol ang maghatag og tumang  kalingawan ngadto sa mga basketball fans sa lungsod sa St. Bernard ug sa Hinundayan, Southern Leyte sugod karong Domingo.

 Pagauloha'g St. Isidore Fiesta Cup 2014, ang torneyo nga nagdala sa tema "The Place Where Champions Meet"   mogahin og  dul-an P300,000 nga ganting salapi.

 Unom ka teams ang magkumbati sa tulo ka adlaw nga torneyo, kini mao ang NCAA reigning champion San Beda  College, University  of  Sto. Tomas ug Omega  Pro nga pulos gikan     sa   Manila,   samtang ang laing tulo  mao ang  University  of   the     Visayas (UV) Green Lancers, University of    San Carlos (USC) Warriors ug commercial team nga AC Troopers.

 Unang magtakus ang San Beda Red Lions batok sa UST Growling Tigers   sa alas-2 sa hapon didto sa Hinundayan gym. Sundan dayon kini sa duwa tali sa Omega Pro batok sa AC Troopers.

 Magtakus sab ang San Beda ug UV sa alas-8 sa gabii ug ang UST batok Omega Pro sa alas-9:30 sa gabii. 

 Aron mosamot kaanindot ang duwa, ang tanang teams  gitugotan nga magdala og tulo ka foreign imports, apan duha lang ang dunganon pagpaduwa.

 Ang kampiyon  makadawat og P100,000, ang second placer makadawat og P75,000 ug ang   third  placer  madawat og  P50,000.     Ang motungtong gikan sa ikaupat hangtod sa ikaunom makadawat og consolation prize nga P20,000 matag team.

  Ang gipasiugdahan sa LGU officials pinangulohan ni St. Bernard Mayor Napoleon Cuaton ug sa ilang Parish Priest nga si Rev. Fr. Joselito Catubig.

 Gipaluyohan sab kini sa MPL Petron, Avendula Purified Water, Kissbone Cove, Global Gasoline Station, Liga ng mga Barangay, Anistar ug  sa Roble Shipping Inc. (BANAT PALARO)