CEBU, Philippines - Mikabkab og bulawan ang Team Cebu kortesiya ni Irenedin Lepatan sa pencak silat sa nagpadayong 2014 Philippine National Games (PNG) kagahapon didto sa kaulohan.
Si Lepatan naka-gold sa female artistic tunggal pinaagi sa pagpilde ni Emraida Hernandez sa Zamboanga ug April Nevarez sa Navotas nga midaog og silver ug bronze medal. Naglaum si Lepatan nga sa maong kadaugan makakuha siya'g luna alang sa nasudnong koponan aron mokumbati sa internasyonal nga mga torneyo.
Sa dragonboat event, duha ka Sugbuanon nga silang Luis Ansag ug Jeffrey Sinangote nga pulos sakop sa team Pyrus midaog sa men's 500m open. Sa laing bahin, ang batan-ong archer nga si Vincent Villa, kinsa naka-gold ug silver sa national evaluation sa national training pool didto sa Dumaguete City, morepresentar sa Cebu sa PNG didto sa Navotas.