CEBU, Philippines - Ambot kinsa kaha'y maayong laki nga sports analysts ang makatag-an aning resulta sa Conference Finals ug ilabi na unya sa NBA Finals.
Mga senyalan man gud kaayo kining mga teams sa nagpadayon nga playoffs tungod kay mapilde sila sa ilang homecourt, apan modaog sa homecourt sa ilang kontra.
Mao kini ang nahitabo kagahapon sa Eastern Conference topseed Indiana Pacers, kinsa midaog batok sa Washington Wizards sa Game-6 sa iskor 93-80 didto sa Verizon Center sa Washington, D.C.
Sa Game-1 sa first round, pilde ang Pacers sa eighth-seed Atlanta Hawks ug sa Game-1 sa second round (semifinals), pilde sab ang Pacers sa Wizards.
Mao sab ang nahitabo sa Oklahoma City Thunder, kinsa napilde dayon sa Los Angeles Clippers sa Game-1 sa West semis, apan human modaog si Kevin Durant pagka-MVP, midaog sila sa Game-2 didto sa Oklahoma. Sama sa series tali sa Pacers ug Wizards, didto sab tiwasi sa Thunder ang Clippers sa ilang korte sa Staples Center.
Ang Pacers ug Thunder parehong miabante sa 4-2 nga baraha, samtang ang Heat ug Spurs misulod sab sa Conference Finals sa 4-1 nga baraha.
Usahay, aduna gyu'y abilidad nga dili hisabtan kining mga NBA players o mga NBA teams.
Didto sa Washington, naglabaw ang Pacers og 16 puntos, apan mi-rally aron modaog. Didto sa Los Angeles, biya ang Thunder og 16 puntos, apan mi-rally sab sila aron modaog.
Magtakus na pag-usab ang defending champion Miami Heat batok sa Pacers sa Lunes alang sa Game-1 sa best-of-seven series sa Eastern Conference Finals. Kun sa miaging tuig, adunay homecourt advantage ang Heat, balit-ad sab karong tuiga kay ang Pacers na
sab maoy nakakuha'g homecourt advantage. Busa kun ugaling moabot gyud og Game-7 ang ilang series, makahibawo na kamo kun kinsay nakapabor.
Homecourt ra gyu'y gihuptan nga dakung bentaha sa Heat sa miaging tuig, dili lang batok sa Pacers apan hasta sab sa Spurs kinsa ilang gipilde sa NBA Finals sa Game-7.
Kun unsa gyud ka-maayong laki kining Heat kinsa nagtinguha og three-peat, anhi makita nga dili na sila maoy topseed.
Sa higayon nga malutsan sa Heat ang Pacers, laing homecourt advantage maoy ilang putlon sa higayon nga adunay "rematch" batok sa Spurs.