Mga tang-ang imports sa Governor's Cup

CEBU, Philippines - Mga tang-ang  imports sa PBA  ang mag-abot sa  Governor’s Cup nga tentatibong sugdan sa Domingo o dili ba sa Martes.

 Nag-agad kini sa resulta sa finals series tali sa San Mig Coffee Mixers ug Talk 'N Text Tropang Texters nga kasamtangang nag-ilog sa Commissioner's Cup title.  Sayong sugdan ang Governor's Cup aron  mahatagan og taas nga panahon nga

makapangandam ang mga PBA cagers nga apil sa  line-up sa Smart Gilas Pilipinas, kinsa moduwa sa 2014 FIBA World Cup sa Agosto didto sa Spain.

 Masentro sa atensyon sa mga fans ang mga imports nga pulos wala milapas sa  6-foot-5 height limit.

 Ang defending champion San Mig mikuha pagbalik  ni Marqus Blakely, samtang ang San Miguel Beermen mibira ni Reggie Williams.

 Ang ikatulong San Miguel Corp. team nga Barangay Ginebra San Miguel mikuha ni Zaccheus Mason.

 Gikuha sa Rain or Shine Elasto Painters ang serbisyo sa karaang PBA import nga   si  Arizona Reid. Ang Talk 'N Text, Meralco Bolts  ug  Alaska Aces  mikuha  sa  serbisyo sa  mga   kanhi  NBA  cagers nga sila si Otthyus Jeffers, Terrence Williams ug Bill Walker.

 Ang Air21 bidahan ni Allen Durham, samtang si Eric Wise ang import sa Barako Bull ug si Leroy Hickerson   sa GlobalPort. (BANAT PALARO)