Batarilan, Villamor nidominar sa ilang dibisyon sa labing unang "Dagan Alang sa Simbahan"

CEBU, Philippines -  Gidominar nila ni Judelle Batarilan ug Leonora Villamor ang tagsa-tagsa nila ka dibisyon sa labing unang "Dagan Alang sa Simbahan" niadtong Domingo didto sa Mabolo Elementary School grounds sa barangay Mabolo, ning siyudad.

 Si Batarilan maoy labing paspas sa men's 10K division diin iyang gitapos ang lumba sa oras nga 40:31. Sila si Jose Baguio (42:12) ug Leo Amanzera (47:52) mi-okupar sa ikaduha ug ikatulo nga dapit.

 Sa pikas bahin, si Villamor mao sab ang nag-una sa women's division. Nitadlas siya sa finish line  sa oras 48 minutos ug 43 segundos.  Si  Tessie  Escasinas mipahiluna sa ikaduha sa oras nga 51:55, gisundan ni Gina Rota nga mi-oras og 56:01.

 Si Russell Ardiente maoy naghari sa men's 5K division samtang sila Ronald Bao-as (24:16) ug Jerson Casinillo (25:15) miangkon sa mosunod nga duha ka pwesto.

 Ang top three finishers sa women's 5K mao sila si Sunshine Cunanan (41:14), gisundan ni Kierstinne Moralde (41:16) ug Emily Porcia (52:16).

 Sila si Gerald Berengel (10:31) ug John Israel Bocala (10:42) maoy miangkon sa unang duha ka dapit sa men's 3K division. Nalandig sa ikatulo si Loren Codera sa oras nga 11:04.

 Samtang si Desiree Salas maoy hara sa women's 3K  human niya gitapos ang dagan sa oras nga 14:58. Si Evelyn Agad mitapos sa ikaduha nga mioras og 18:59, gisundan ni Janelle Villarampa   sa  oras nga 20:20.

 Sila si Mario Macarine (11:04), Eleazar Lozano (15:55) ug Pepito Teves (20:20) maoy top three finishers sa men's 1K senior citizen division, samtang sa women's side, ang top three mao sila si Visayas Arnado (12:08), Josefina Herbabuena (12:09) ug Estrella Pacana (14:03).

 Ang labing unang "Dagan Alang sa Simbahan" usa sa mga kalihukan  sa ika-222nd nga kasaulogan sa kapistahan  sa  St. Joseph the Patriarch Parish karong Mayo 18.

 Gidumala ni race director Kenneth Casquejo , ang lumba magsilbe usab nga fund-raising event diin ang kita nga matigum gikan sa registration maoy gamiton  sa pag-renovate sa maong parokya.