“Centralized training” makatabang sa CVIRAA

CEBU, Philippines - Pagpahiluna sa ikaupat nga dapit sa Central Visayas Regional Athletic Association (CVIRAA) usa ka wake up call ngadto sa Department of Education (DepEd) Regional officials ug sa nagkadaiyang local ug provincial government units nga mohimo’g centralized training program  sa pagpangandam alang sa Palarong Pambansa.

Dugang pa niini, si DepEd-VII PESS chief  Dr. Vivian Ginete naglaum nga  ang uban mamati ug mopatalinghug  sa iyang panawagan alang sa kausaban sa  sukaranan  sa overall standing  sa  maong  multi-sporting event.

Ang Palaro ning tuiga, migamit og Olympic medal count human sa pipila ka tuig nga paggamit og  point system.

 Si Ginete, kinsa gikatakdang moretiro sa Marso sunod tuig, mikuwestiyon na sa Olympic medal count  atol sa katapusan nilang tigum uban ni DepEd          Assistant Secretary Tonisito Umali human sa Palaro. Matud pa ni Ginete nga dili maayo alang sa mga rehiyon kinsa maayo sa mga ball games, apan hinay sa medal-rich sports sama sa swimming ug athletics.

Gikuwestiyon sab ni Ginete ang format sa torneyo nga gigamit sa ubang mga ballgames.

Gawas sa medal count ug tournament format, si Ginete nagkanayon nga  ang CVIRAA angay sab nga mopaubos og  “centralized training” aron maayo ang dagan sa ilang kampanya sa Palaro. 

Nasayran nga ang ubang mga rehiyon adunay “in-house” training sud sa tulo ka bulan sa dili pa ang Palarong Pambansa nga wala matagamtami sa CVIRAA.       

“We don't have an in-house training mainly because we don't have the funding to do it. Maayo pa ang Northern Mindanao because they have the support from the provincial and LGUs," matud pa ni Ginete sa The Freeman, ang igsuong mantaalan sa Banat News.

 Ang pagbaton og in-house training mapasayon sa mga coaches ug trainers sa pag-monitor sa dagan sa training sa ilang mga atleta, nutrisyon ug ingon man mas maayong teamwork ug panag-usa sa kaubanan ug sa tibuok delegasyon.

Ang CVIRAA mihipos og 24 golds, 27 silvers ug 41 bronzes pinaagi sa arnis, archery, chess, badminton, gymnastics, taekwondo, football, volleyball, swimming, athletics, boxing, table tennis ug lawn tennis. ((BANAT PALARO)