Durant MVP!

CEBU, Philippines -  Ang ato ra gyud nga makita diha sulod sa korte matag duwa ni Kevin Durant sa Oklahoma City Thunder mao ang pagtabas-tabas niya sa net matag mosulod ang iyang mga basket ilabi na ang mga three-pointers. Ang wala nato hisayri nga si Durant usa ka mapahiubsanon kaayong tawo ug kun nakadungog man kamo sa iyang diskurso atol sa pagpili kaniyang MVP sa NBA, medyo matandog sab ang inyong balatian.

 Niadtong Martes, pormal nga gitunol ngadto kang Durant  ang Maurice Podoloff Trophy isip 2013-2014 Kia NBA Most Valuable Player.
 Ang maong pasidungog gihimo usa ka adlaw human pakauwawi sa Los Angeles Clippers ang Thunder sa Game-1 sa West Conference semifinals , 122-105. Ambot og usa ba kadto ka matang sa pagsungog nga inay napilde, diha pa mogawas nga siya maoy MVP.
 Si Durant nakakuha'g 1,232 puntos nga naglakip sa 119 first place votes gikan sa panel nga 124 voters nga gilangkuban sa mga sportswriters ug mga broadcasters sa tibuok Estados Unidos ug sa Canada. Ingon man sa NBA.com MVP fan vote nga naghimo'g kinatibuk-ang 125 ka balota.
 Mao kini ang unang MVP award  ni Durant, kinsa bag-o lang nahimong scoring champion sulod sa upat ka sagunson nga higayon sa lima ka seasons. Nalakip na siya sa mga NBA Greats sama nilang Wilt Chamberlain, George Gervin ug Michael Jordan isip players nga nakahimo sa maong kalampusan.
 Si Durant maoy migiya sa Thunder ngadto sa ilang 59-23 win-loss record nga maoy ikaduhang labing maayong rekord karon nga season bisan pa nga 46 lang ka higayon nga nakaduwa ang iyang scoring buddy nga si Russell Westbrook.
 Gipilde ni Durant sa botasyon silang LeBron James sa Miami (891 points), Blake Griffin sa Los Angeles Clippers (434 points), Joakim Noah sa Chicago Bulls (322 points) ug James Harden sa Houston Rockets (85 points).
 Game-2 karon sa Thunder-Clippers series ug segurado ako nga dili na kini sipyaton ni Durant nga mowadwad og maayo aron  makatabla sa series, 1-1 inig-tapon sa duwa didto sa Staples Center sa Los Angeles, California.
 Makadugang sa morale ang pagpili kang Durant nga MVP ug wala tingali player sa OKC nga dili madasig niini ilabi na silang Westbrook, Serge Ibaka, Thabo Sefolosha ug Nick Collison nga kanunay nganlan ni Durant sa iyang acceptance speech.
 Sa akong tan-aw, igo lang gisukod sa Thunder ang kaladmon sa Clipppers, busa karong duwaa, dili na sila mosugot nga latiguhon  sa ilang nataran kay usa na kana ka pagbiaybiay sa team nga diha maggikan ang MVP.
 Wala mabantog ang Clippers nga usa ka maayong defensive team, busa kun  nalutsan nilang Durant silang Tony Allen, Mike Conley, Marc Gasol ug Zach Randolph sa Memphis Grizzlies nga hugot kaayong modepensa, walay katarungan nga dili nila tagakon ang Clippers. (BANAT NEWS)