CEBU, Philippines - Mopahuway la'g usa ka buwan si IBF light flyweight champion Jonhriel Casimero, kinsa gilangkatan sa iyang bakus tungod kay "overweight," apan inig balik niya'g saka sa ring ubos sa flyweight division mahimo na sab siyang kampiyon.
Mao kini ang gipasalig sa promoter ug manager ni Casimero nga si Sammy Gello-ani.
Matud pa ni Gello-ani nga usa sa nakaingon nganong na-overweight si Casimero mao ang kanunay nga pag-uswag sa International Boxing Federation (IBF) sa mandatory defense sa iyang boksidor.
Una unta kining gikatakda niadtong Pebrero, apan giuswag ngadto sa Marso, apan gisibog na sab kini, ug sa katapusan nahingpit ang away ni Casimero kagahapon didto sa Waterfront Cebu City Hotel and Casino.
Si Gello-ani bag-o lang nakadawat og suwat gikan sa IBF alang sa mandatory defense ni Casimero, apan tungod kay naglisod sila'g pili kun kinsa'y ilang iparang, ang IBF maoy nagpili sa iyang kontra nga si Mauricio Fuentes gikan sa Colombia.
Atol sa weigh-in niadtong Biyernes didto sa The Event Centre sa SM City-Cebu, si Casimero mitimbang og 113.5 lbs. sobra'g lima ka libras sa gihatag nga 108 lbs weight-limit nga yano kaayong nakuha ni Fuentes.
Si Gello-ani nagkanayon nga malagmit "over confident" lang gyud si Casimero nga makuha ang iyang timbang tungod kay dinhi sa Sugbu ang away sa labing unang higayon. (BANAT NEWS)