CEBU, Philippines - Natagak na ang Charlotte Bobcats ug nataktak na sab ang Chicago Bulls. Ang topseed sa Eastern Conference nga Indiana Pacers katagakon na ug ang Oklahoma City Thunder hapit na ug ingon man sab ang Houston Rockets.
Matingala tingali ang atong mga suki sa Banat Sports ngano man kini. Sa regular season ang mga topseeds sama sa Indiana, Chicago, Oklahoma ug Houston maayo man kaayo og agi unya nganong sa playoffs magkadipodipo man?
Kini maoy akong hubad niini.
Sa regular season, lain-lain ang makontra sa imong paboritong team matag adlaw, busa makapangandam ka o makabuhat ka'g maayong game plan kun lig-on ang imong kontra. Apan mahimo sab kang mo-relax kun dili kaayo lig-on ang imong kontra. Nakahibawo na ang teams sa ilang strategy. Lahi ang ilang gamiton nga tactics kun Miami o San Antonio ang ilang kontra, apan lahi sab ang ilang gamiton nga taktika kun Utah o Milwaukee ang ilang makontra.
Apan sa playoffs, matag duwa sud sa labing menos upat ka duwa sa series o labing daghan pito kun moabot og Game 7, mao ra gyud kanunay ang imong kontra. Busa ang playoffs usa ka "game of adjustments" og kun kinsa nga team maoy daling maka-adjust, kana maoy modaog.
Mahimong magmangtas karon ang maong players, apan inig ka sunod duwa, mahimo sab siyang pugngan ug adto na sab siya makarekober sa ikatulong duwa. Kun dili gyud maantigo mo-adjust ang player ug ang coach, hayan mapilde ang maong team. Bisan gani tingali ang Heat makatilaw unta'g pilde kun himsog pa lang gyud ang sentro sa Bobcats nga si Al Jefferson. Maingon nato nga bisan pa tingali og naa si Jefferson, gamay ra sab ang iyang mahimo ug dili na tingali kinahanglan nga mohimo'g dakung adjustment ang Heat. Ang dakung palpak ning higayona mao ang no. 1 sa East nga Pacers tungod kay wala gyu'y timbang si Paul George. Naay David West ug Roy Hibbert nga maoy kanunay magdala'g pilde ug ang ilang coach nga si Frank Vogel mag-usab-usab og starting unit, apan ang iyang eksperimento, dili gyud mosaler.
Sa Thunder pananglit, naapektohan gyud si Kevin Durant sa hugot nga depensa ni Tony Allen sa Memphis nga diyutay na lang nga mokuyog kaniya sa pansayan aron dili makalusot. Silang Russell Westbrook ug Serge Ibaka daku sab og natabang apan lupig gyud ang Thunder sa depensa.
Kabahin sa Houston, naglibog pa sila karon kun unsaon pagpugong kang LaMarcus Aldridge, kinsa moiskor og labing menos 40 puntos sa playoffs.
Mao nga sa akong lindog upat na ka adlaw ang milabay, dali kaayo akong nakapanimaho nga Portland ug Miami ang magbagat sa NBA Finals. Apan kinahanglan sab lutsan sa Portland ang San Antonio kun ugaling moabante sila sa sunod nga hugna. (BANAT NEWS)