Nietes mas agresibo sa iyang "rematch"

CEBU, Philippines -  Mas agresibo nga Donnie 'Ahas' Nietes (32-1-1, 18KOs) ang moaway ibabaw sa ring sa iyang rematch batok ni Mexican Moises Fuentes (19-1-1, 10KOs) sa Mayo 10 didto sa SM Mall of Asia Arena.

 Si Nietes modepensa sa iyang WBO light flyweight title sa main event sa "Pinoy Pride XXV: The Rematch for Glory."

 "Mas agresibo ko ron compare sa among first fight," matud pa ni Nietes. "Kinahanglan nga mas mosukmag ko og daghan aron modaog ko aning awaya."

 Sila si Nietes ug Fuentes  nagsangka niadtong Marso 13 sa miaging tuig nga miresulta sa controversial majority draw diha sa Waterfront Cebu City Hotel and Casino.

 Ning higayona, ang 31-anyos nga si Nietes masaligon nga hingpit na niyang putlon ang ilang panagribal pinaagi sa pagpilde sa Mehikanong si Fuentes.

 Si Nietes kompiyansa tungod  sa iyang taas nga training camp didto sa USA ug Mexico sa wala pa siya mobalhin sa ALA Gym.

 "Lisud akong training ron kompara sa una ug mas scientific tungod  kay naa ko'y American conditioning coach nga si Nick Curson," sumala pang Nietes.

 Gawas ni Nietes, moaway sab sa Pinoy Pride  XXV mao ang ALA Gym fighters nga silang Milan 'El Metodico' Melindo (30-1, 12KOs) ug comebacking Rey 'Boom Boom' Bautista (34-3, 25KOs).

 Si Melindo moharong ni Mexican Martin 'Diablo' Tecuapetla (11-5, 8KOs), samtang si Bautista makigbatok ni Sergio 'El Cuate' Villanueva (26-3, 13KOs). (BANAT NEWS)