Wizards, 2-0 na Pacers, Raptors nakabawos

CEBU, Philippines - Makapakurat nga duwa ang gihimo sa  Washington Wizards human sila maka-eskapo batok sa Chicago Bulls pinaagi sa overtime, 101-99  kagahapon didto sa United Center sa Chicago, Illinois.

 Si Bradley Beal mirehistro'g game-high 26 puntos alang sa Wizards, kinsa mihimo sa ilang best NBA playoff.

 Ang Brazilian forward nga si Hilario Nene miamot og 17 puntos, samtang si John Wall mitampo'g 16 puntos alang sa Wizards nga nakabentaha na pag-ayo sa series, 2-0 sa best-of-seven Eastern Conference first-round playoff series.

 Ang Games-3 ug 4 motapon sa Verizon  Center sa Washington D.C., ang korte sa Wizards.

 Mao kini ang unang higayon sa franchise history diin ang Wizards nidaog sa unang duha ka duwa gawas sa ilang balwarte, ug unang higayon sukad niadtong 1982 nga nidaog  sa unang duha ka duwa sa playoff series.

 Ang Wizard naglabaw og 17 puntos, apan na-outscored sila sa Bulls, 26-14 sa third period ug miinat sa ilang labaw ngadto sa 87-77 sa final quarter.

 Apan ang Wizards mitapos sa fourth quarter pinaagi sa 14-4 run ug ang free throw ni Beal maoy naghatod sa duwa ngadto sa overtime.

 Si Nene maoy miiskor sa unang sayes puntos sa overtime, apan wala madugay napugngan siya ni Joakim Noah, kinsa maoy napiling Defensive Player of the Year.

 Gikuyawan sab ang Wizards dihang didto sa free throw line si Kirk Hinrich sa nahabiling 2.4 segundos, apan misipyat siya sa iyang tirada sa uwahing bahin sa overtime. Si Hinrich kinsa usa ka 76 percent free throw shooter karon nga season, may higayon untang motabla sa iskor, apan misipyat siya sa unang free throw ug gituyo sab niya  pagsipyat ang ikaduha niyang tira. Nakuha ni Trevor Arinza ang rebound aron pagselyado sa kadaugan sa Washington.

 Si D.J. Augustin maoy topscorer sa Buls pinaagi sa iyang 25 puntos, samtang ang reserve nga si Taj Gibson miamot og 22 puntos ug si Noah adunay 20 puntos uban ang 12 ka rebounds.

 Sa laing aksiyon, gipruyba ni Paul George nga siya'y gikinahanglan aron modaog ang Indiana Pacers dihang miburak siya og 27 puntos, 10 ka rebounds ug unom ka assists alang sa ilang 101-85 nga kadaugan batok sa Atlanta Hawks, 101-85  sa Game-2   didto sa Bankers Life  Fieldhouse sa Indianapolis, Indiana.

 Gawas nga nakabawos, ang Pacers mitabla sab sa series, 1-1 sa Eastern Conference.

 Si George Hill midugang og 15 puntos  alang sa Indiana.

 Napugngan ni George ang pointguard sa Atlanta nga si Jeff Teague ug gawas sa iyang opensa, nakahimo sab siya og upat ka steals.

 Ang Game-3 sa Indiana-Atlanta series himuon ugma diin ang Hawks na sab maoy mo-host sa mosunod duha ka duwa.

 Didto sa Air Canada Centre, nakatabla sab sa series ang Toronto Raptors, 1-1 human makabawos ngadto sa Brooklyn Nets sa iskor nga 100-95.

 Si DeMar DeRozan miposa'g 30 puntos aron pangulohan ang Raptors kinsa nakabawi sa ilang kapildihan sa Game-1.

 Karong adlawa, magsangka ang defending champion Miami Heat batok sa Charlotte Bobcats, moduwa sab ang  overall leader San Antonio Spurs batok sa Dallas Mavericks ug   ang Houston Rockets makigsangka batok sa Portland TrailBlazers. (BANAT NEWS)