Memphis, in; Phoenix, out

 CEBU, Philippines -  Nakuha sa Memphis Grizzlies ang ikawalo  ug katapusang luna sa playoffs sa Western Conference human sa ilang kadaugan batok sa Phoenix Suns, 97-91 kagahapon didto sa US Airways Center sa Phoenix, Arizona.

 Miiskor og 32 puntos si Zach Randolph aron pangulohan ang Grizzlies, kinsa miharos sa ilang season match-up batok sa Suns, 4-0.

 Ang three-pointer ni Mike Conley maoy naghatag sa Memphis og 93-91 nga labaw sa nahabiling 1:08 sa duwa.

 Si Mike Miller midugang og 21 puntos, samtang si Marc Gasol miabuno'g 17 puntos alang sa Memphis. Samtang si  Conley mihipos og 13 puntos aron tabangan  ang Grizzlies nga moabante sa playoffs sa sunod-sunod nga upat ka tuig.

 Gipangulohan ni Markieff Morris ang Suns pinaagi sa iyang 21 puntos, gisundan nilang Channing Frye ug Dragic nga adunay  14 puntos matag usa.

 Ang Phoenix maoy ikalimang team sa kasaysayan sa NBA nga midaog og 47, apan pakyas pag-abante sa playoffs.

 Nahitabo ang 15 ka lead changes didto sa fourth quarter ug walay bisan kinsa  sa duha ka teams ang milabaw og tres puntos sa wala pa hingpit moratsada ang Memphis.

 Ang ikalimang three-point ni Miller, kinsa mihimo'g unom ka attempts gikan sa 3-point arc, maoy naghatag sa Grizzlies og 86-85 nga labaw sa katapusang 3:10 sa final period. Mibawos paglabaw ang Phoenix sa basket ni Miles Plumlee, 87-86 ug gitubag sab dayon ni Gasol alang sa 88-87 nga bentaha sa nahabiling 2:23. (BANAT NEWS)