CEBU, Philippines - Misaad si WBO light flyweight champion Donnie 'Ahas' Nietes (32-1-1, 18KOs) nga tuldokan na ang ilang panagribal ni Mexican Moises Fuentes (19-1-1, 19KOs) atol sa ilang sangka sa "Pinoy Pride XXV: The Rematch for Glory" sa Mayo 10 didto sa SM Mall of Asia Arena sa Pasay City.
Sila si Nietes ug Fuentes magsangka pag-usab human sa kontrobersyal nilang 12-round draw niadtong Marso sa miaging tuig diha sa Waterfront Cebu City Hotel and Casino.
"Matuldokan na gyud aning awaya. Daghan ko og nakat-onan sa among first fight ug ipakita nako akong improvement," matud pa ni Nietes atol sa press conference kagahapon didto sa Cebu Rajah Park Hotel.
"Basin sa laing weight division mag-abot mi, pero sa kani nga away maingon nako nga katapusan na," dugang pa ni Nietes.
Si Nietes naglaraw nga mobuak sa rekord ni Pinoy boxing legend Gabriel 'Flash' Elorde isip longest reigning Filipino world champion.
Laing duha ka ALA Boxing Gym superstars ang mopakita sab og aksiyon sa maong blockbuster card.
Si one-time world title challenger Milan Melindo (30-1, 12KOs) ug comebacking Rey Bautista (34-3, 25KOs) makigsangka batok sa Mehikano nilang mga kaatbang. Harungon ni Melindo si Martin Tecuapetla (11-5, 8KOs), samtang sukdon ni Bautista ang abilidad ni Sergio Villanueva (26-3, 13KOs).