CEBU, Philippines - Makabaton na sab og laing kahigayonan ang mga batan-ong chess players dinhi sa Sugbu sa pagpakita sa ilang abilidad pinaagi sa Cebu Executives and Professionals Chess Association (CEPCA) Kiddies Tournament karong Sabado diha sa bag-ong giablihan nga Cebu Chess School nga nahimutang sa ikaduhang andana sa Central Books Building sa dalan P. del Rosario, Cebu City.
Ang 7-round Swiss system competition bukas ngadto sa aspiring chess players nga nagpangedaron og 14-anyos ug paubos.
Ang kampiyon sa boys division makadawat og P2,000, mopahiluna sa ikaduha makaangkon og P1,500 ug ang ikatulo mobulsa og P1,000.
Motugpa sa ikaupat ug ikalima nga dapit makadawat og P700 ug P500 matag usa.
Sa girls division, ang kampiyon makadawat og P1,500, ikaduha P1,200, ikatulo P800, ikaupat P600 ug ang ikalima P400.
Ang top three performers sa mga partisipante nga nag-edad og 10-anyos ug paubos hatagan og bonus nga P500.
Aduna kini registration fee nga P75 alang sa girls ug P100 sa boys.
Sugdan ang registration sa alas-9 sa buntag, samtang ang duwa magsugod sa alas-10:30 sa buntag. (BANAT PALARO)