CEBU, Philippines - Aron pagseguro nga hapsay ug walay mga kakulian sa iyang pagpalumba'g balik isip organizer, ang tinahod nga businessman-sportsman nga si Lou Ornopia maoy mangunay pagsuperbisar sa pagahimuong world-class racetrack alang sa iyang umaabot nga motocross competition karong Domingo didto sa Brgy. Calambua sa San Remigio.
"We've painstakingly designed our race course to make it more exciting and appealing for the riders. This is my comeback race and I want to make it an event to remember for the participants," matud ni Ornopia, ang "Sportsman of the Year" awardee sa Sporswriters Association of Cebu (SAC).
Ang big boss sa MS Motosuit nga si Ornopia giisip usab nga "Godfather of Cebu Motocross."
Ang lumba nga pagauloha'g "15th Calambua Motocross Cup," salmotan og kapin 100 ka riders lukop nasud.
Sa iyang pagpalumba'g balik, si Ornopia plano unang mopahigayon og unom ka leg ning tuiga nga usa sa mga dakung kalihukan sa tinuig nga kapistahan sa Calambua agi'g pasidungog sa ilang mahal nga patron San Vicente Ferrer.
Angay'ng atngan sa maong lumba mao ang riders gikan sa Kopiko Racing Team, Quickflight Racing, Sel J, NR Racing, Team Dinagat ug Team Bubuli. May mga entrante sab gikan sa Dumaguete, Davao ug Luzon.
Mga kategoriya nga tigian mao ang mini 60cc ug 85cc, beginners, local enduro, open enduro, executive A, B ug C, novice, intermediate, expert ug pro open.
Ang usa ka adlaw nga lumba suportado sab sa F&FO Motor Parts, JCO Motor Parts, Prospeed, Speed-up, Quick Flight, Motomaze, Keiz BJ Motors, Bradder Moto Access, RMO Motor Parts, NF Motor Parts, Aike Motor Parts, Ljun Motor Parts, Sanitech, Dr. Andy Uy, Jonathan Cuyos, Edwin Dilao, Ramon Montealto ug Diosdado Navarez. (BANAT NEWS)