CEBU, Philippines - Gidabo-dabohan sa Team Endab ang dinaog-daog nga Team Richards aron moiskor og 102-87 nga kadaugan sa As-Es B.A.R. First Conference basketball tournament didto sa Benjamin Solon Memorial Gym sa Brgy. Cogon Ramos, ning siyudad.
Unom ka players sa Team Endab ang miiskor og double figures sa pagpangulo ni Arjohn Colinares, kinsa mipabuto’g 22 puntos. Si Angelo Sta. Rita mipupo’g 16 puntos ug si Bart Sanchez mipuga’g 14 puntos alang sa Team Endab nga miratsada sa second quarter aron moiskor og 60-39 nga bentaha sa halftime.
Miaksyon og gukod ang Team Richards sa giya ni Lahug Brgy. Councilor Andrew Biton aron makan-an ang labaw ngadto na lang sa 14 puntos, 81-67 apan didto ra kutob ang ilang paningkamot kay ang Team Endab misukli og mga puntos aron mailog ang daog.
Si Raul Endab miamot og 13 puntos, samtang sila si Tedong Mendoza ug John Realista parehong mihakot og 12 puntos sa maong kadaugan.
Ang Team Richards gipangulohan ni Biton, kinsa mikimada og 21 puntos, gisundan ni Israel Polar nga adunay 15 puntos. Si Richard Regidon mitimbre’g 11 puntos ug silang Art Arellano ug Henry Tan miariya og 10 puntos matag usa alang sa naparot nga Team Richards. (BANAT PALARO)