PRISAA-7 "Four-Peat" ang tuyo

CEBU, Philippines - Sugdan na karong adlawa ang mga duwa sa 2014 Private Schools Athletic Association (PRISAA) National Games didto sa Tagum City.

Naglaum ang mga officials ug coaches sa PRISAA-7 nga madepensahan nila ang ilang overall title bisan mosalmot lang sila sa athletics ug volleyball.

Kadaghanan sa mga delegado sa rehiyon nagagikan sa Cebu, samtang ang Bohol maoy bahala sa batted sports ug women’s basketball.

Ang Sacred Heart School-Ateneo de Cebu (SHS-AdC) mopakita’g aksiyon sa athletics, samtang ang Southwestern University (SWU) mopadala sa ilang secondary volleyball team.

Madasigon karon ang Central Visayas sa ilang kampanya alang sa makasaysayanong "four-peat" sa maong tinuig nga torneyo.

Kini human ang Region 7 pormal nga gibayaw ngadto sa Hall of Fame pinaagi ni PRISAA Sports Foundation nga gipangulohan sa ilang National Presidente Emmanuel Angeles tungod sa wala'y putol nga paghari sud sa tulo ka katuigan gikan sa 2011 hangtod sa 2013.

Gawas pa niana, ang PRISAA-7 nakadawat sab og laing duha ka pasidungog -- ang "Dr. Isidro Cariño Award" nga usa sa top three performing regions sa pro-rata contributions ug ang Dr. Cecilio G. Hechanova Award" pinaagi ni swimmer Lorendale Echavez nga usa sa upat ka atleta nga mihakot og daghang medalya sa miaging tuig.

Gipasidunggan sab ang University of San Carlos (USC) isip usa sa top performing member schools sa miaging national meet, samtang sila Augusto W. Go, ang presidente sa University of Cebu (UC) ug Fr. Vicente Uy, SVD sa Holy Name University, ang incumbent regional president gitunolan sab og Dr. Dolores H. Sison Award.

Ang PRISAA Meet pormal nga sugdan karong adlawa, apan ang mga duwa ugma pa ipahigayon.   (BANAT PALARO)