Team Bastida, 4-1 na sa As-Es BAR caging
CEBU, Philippines - Nausban og laing kadaugan ang Team Bastida aron temporaryong magsolo sa liderato sa nagkainit nga aksiyon sa As-Es B.A.R. First Conference basketball tournament.
Ang Team Bastida ubos sa giya ni Louie Tanggol yano kaayong milubong sa Team Alcover, 103-74 niadtong Lunes sa gabii didto sa Benjamin Solon Memorial Gym sa Brgy. Cogon Ramos, Cebu City.
Si Tanggol mitikdol og 22 puntos, samtang sila si Reynolds 'Barako' Zamora ug Rocky 'Robacs' Bacalso mitimang og 15 puntos matag usa alang sa 4-1 nga Team Bastida nga milansang og 28-11 sa first quarter. Gibingat pa ang ilang labaw ngadto na sa 29 puntos sa halftime, 59-30.
Misuporta sab silang Arvin Rodriguez, Richard Lanutan ug Jojo Pada nga adunay 10 puntos matag usa.
Ang walay kukaluyang si Randyll Roncal mao gihapon ang nangu sa Team Alcover nga mibagdok og 41 puntos, apan nausik lang ang iyang mga paningkamot kay ang iyang koponan nakatilaw sa labing unang pilde sud sa tulo ka duwa.
Si Kerby Raboy miamot og 13 puntos alang sa Team Alcover nga pirmeng naggukod gikan sa pagsugod hangtod na sa pagkahuman sa duwa.
PUNTOS MATAG USA
TEAM BASTIDA (103) – Tanggol 22, Bacalso 15, Zamora 15, Rodriguez 10, Lanutan 10, Pada 10, Obcial 6, Sabay 4, Rojas 3, Bastida 2, Aniñon 2, Godiz 2.
TEAM ALCOVER (74) – Roncal 41, Raboy 13, Aliñabon 6, Ylaya 5, Secuya 4, Do 3, Piñas 2.
- Latest
