Nasalbar ni Holper

CEBU, Philippines - Ang three-point shot ni Melvin Holper maoy nagsalbar sa Southwestern University (SWU) Cobras ngadto sa kulbahinam nga 64-60 nga kadaugan batok sa bisita nga UAAP member-school National University (NU) Bulldogs aron sakmiton ang titulo sa 1st Mandaue Mayor's Cup Inter-Collegiate and Inter-Barangay basketball tournament niadtong Sabado didto sa Mandaue City Sports and Cultural Complex.

Nahimutang unta sa delikadong kahimtang ang Cobras  ilabi na kay naapas sa Bulldog ang ilang biya nga 13 puntos sa fourth period, 42-55 may 7:27 ang nahibiling oras sa duwa.

Misamot pa gyud ka kuyaw ang sitwasyon dihang na-fouled out silang Landry Sanjo ug Adams Mohammed alang sa Cobras.

Silang Gelo Alolino, Jeth Troy Rosario ug ang wa'y kahadlok ug kusgan nga power forward nga si Glenn Khobuntin maoy mipasiugda sa ilang rally sa tunga-tungang bahin sa fourth period pinaagi sa pagpauwan og puntos aron sila makasikit.

Mihulga ang Bulldogs sa iskor, 59-60 pinaagi sa split charities sa ilang import nga si Alfred Aroga may 59.3 segundos ang nahibiling oras sa duwa. 

Atol sa mainitong rally sa Bulldogs, na-fouled na silang Landry Sanjo ug shooter Adams Mohammed nga maoy naghatag og kahigayonan sa Bulldogs nga mo-iskor ug posible untang come-from-behind nga kadaugan.

Nakakubit sa iyang kataposan ug ika-limang foul si  Sanjo ngadto kang Aroga ug penalty na ang Cobras apan igo lang siyang nakahimo'g usa sa duha ka free throws,59-60 ug samtang naglingkod na si Sanjo sa ilang bench, gipulihan siya ni Holper kinsa nakaitsa dayon og three-point shots aron hatagan ang Cobras og 63-59 sa kataposang 34 segundos sa duwa.

Mao lang kadto'y puntos ni Holper sa maong duwa.

Ang dangog nga point guard ang Fil-Am nga si Jasper Parker kinsa maoy naghimo sa final score nga 64-60, maoy napiling tournament MVP.

Gilantugian una sa makadiyot ang opisyal nga score sa Cobras kung kini ba 43-29 o 41-29 lang sa may 5:58 ang oras sa third canto.

Hinoon nahusay ra sab kini dihang mi-uyon si Bulldogs coach Eric Altamirano nga husto ang 43-29 nga iskor sa Cobras.

Walay nakapiog kang Sanjo sa ilawom nga maoy iyang paboritong pwesto aron pangulohan ang Cobras sa iyang  21 puntos samtang may 12 puntos si Mark Jayven Tallo ug may 10 puntos si Mohammed.

Si Khobuntin kinsa solido kaayong modepensa ug na-fouled out sa nahibiling pipila ka segundos sa duwa, maoy nangu sa Bulldogs sa iyang 13 puntos samtang silang Alolino ug Rosario midugang og 12 puntos matag usa.

Sa sayo pa, naka-ipsot sab ang University of San Jose Recoletos (USJR) Jaguars batok sa University of the Visayas (UV) Green Lancers sa tip-in ni Kevin Villafranca atol sa paghuni sa buzzer, 62-60 aron maangkon ang ikatulong pwesto. 

Si Villafranca maoy nangu sa Jaguars sa iyang 19 puntos lakip ang winning basket samtang sila si Wowie Escosio ug Francisco Arong maoy nangu sa Lancers sa ilang 12 ug 10 puntos, matag usa.

Puntos matag usa:

First Game:

USJR (62)---    Villafranca 19, Suano 15, Bayhonan 12, Catipay 8, Regalado 5, Lajato 4, Navarra 4, Senining 2.

UV (60)---       Escocio 12, Arong 10, Suerte 7, Ferraren 7, Octobre 7, Codilla 3, Perolino 2, Mpoma 2.

Second Game:

SWU (64)---      Sanjo 21, Tallo 12, Mohammed 10, Parker 9, Goloran 6, Bregondo 4, Holper 3.

NU (60)---       Khobuntin 13, Alolino 12, Rosario 12, Neypes 7, Aroga 6, Celda 5, Betayene 2, Atangan 2, Javelona 1. Halftime: 35-23. (BANAT NEWS)