CEBU, Philippines - Gisirohan sa Don Bosco United Football Club ang Subangdaku FC, 5-0 aron masakmit ang titulo sa under-23 division sa 16th Aboitiz Football Cup kagahapon didto sa Aboitiz Sports Field sa Brgy. Subangdaku, dakbayan sa Mandaue.
Gidominar sa Don Bosco United FC ang kinatibuk-ang duwa ug wala gyud mohatag og higayon sa Subangdaku nga makakuha'g usa ka goal.
Ang Nigerian nga si Christopher Ngwanta maoy nangu sa Don Bosco United FC dihang mihimo siya'g upat ka goals ug si Enh Famous mitampo'g usa ka goal sa katapusang minuto nga maoy mikandado sa kadaugan.
Gawas sa titulo, upat sa lima ka special awards ang nakubit sa magduduwa sa Don Bosco United FC dihang si Famous napiling Most Valuable Player, si Ngwanta (topscorer), Jay Vesin (best goal keeper) ug Exekpelazy Musa (best defender).
Si Michael Tasa sa Subangdaku FC maoy giila nga best midfielder.
Ang University of San Carlos (USC) mipahiluna sa ikatulo human midaog batok sa Leylam FC pinaagi sa 4-3 penalty shootout. (BANAT NEWS)