CEBU, Philippines - Pulos pagdayeg ang gipadangat ni Fighting Championship (UFC) bantamweight star Urijah 'California Kid' Faber ngadto sa mga Filipino fighters ug ingon man ang nagkasikat nga sport nga Mixed Martial Arts (MMA) dinhi sa nasud atol sa iyang Mall Tour niadtong Huwebes didto sa SM City-Cebu.
Ang usa sa mga labing sikat nga UFC star nakighimamat sa iyang mga fans nga kabahin sa iyang 10-day trip dinhi sa nasud. Si Faber mopahigayun usab og seminars ug mga community outreach.
"MMA fans here are awesome and it makes me happy that my sport is gaining popularity in the Philippines," matud pa ni Faber nga mipakita sa iyang hait nga striking ug ground skills atubangan sa mga Cebuano fans.
Si Faber, suod nga higala ni Fil-Am middleweight contender Mark Muñoz, masaligon nga sa dili madugay, usa ka Pinoy MMA fighter ang mahimong UFC champion.
Ang kanhi World Extreme Cagefighting (WEC) featherweight champion, naghupot og rekord nga 30-7, apan napilde siya sa katapusan niyang sangka batok ni UFC champion Renan Barao sa Brazil pinaagi sa kontrobersyal nga 1st round TKO.