CEBU, Philippines - Lima ka Sugbuanong triathletes ang nakalahutay sa labing lisud nga triathlon race dihang nilampos sila paghuman sa 2014 Ironman Asia-Pacific Championship sa miaging gabii didto sa Melbourne, Australia.
Naglakip kini nilang Meyrick Jacalan, Gianluca Guidicelli, Andrew Ong, Jane Ong ug Dr. Alberto Solis Jr.
Gilangoy sa triathletes ang 3.8 kilometer swim sa Frankstorn Foreshore sa wala pa mopadayon sa 180-kilometer bike.
Si Jacalan, kinsa misalmot ubos sa 40-44 division midagan sa 42.2 kilometer run ug maoy unang Sugbuanon nga milabang sa finish line sa oras nga 12:50.43. Si Solis maoy ikaduhang Sugbuanon nga milabang sa finish sa oras nga 12:50.43 ubos sa 45-50 category.
Si Andrew Ong milatas sa finish line sa oras nga 14:10.47 ubos sa 35-49 division, samtang si Guidicelli mioras og 14:10.48 sa 50-55 class.
Gitapos ni Jane Ong ang lumba sud sa 15 ka oras ug 22 segundos ubos sa 40-44 category.
Sa laing bahin, ang Fil-American nga si Arland Macasieb maoy miiskor og dakung kadaugan dihang mipahiluna siya sa ikaduhang dapit sa overall sa pro division. Si Macasieb mitapos sa lumba sa oras nga 8:02.14 sunod ni Asia-Pacific champion Dirk Bockel sa oras nga 8:01.02.
Laing duha ka pros nga midala sa bandila sa Pilipinas mao sila si Paul Matthews, kinsa nahimutang sa 27th sa overall sa oras nga 10:16.44 ug Dan Brown sa 28th sa oras nga 11:53.17. (BANAT PALARO)