CEBU, Philippines - Usa ka talagsaong lumba sa 'Baroto' nga pagasalmotan sa mga mangingisda gikan sa nagkalain-laing lungsod sa Probinsya sa Sugbu ang molamas sa 69th Anniversary Celebration sa makasaysayanon nga Landing of the American Liberation Forces sa dakbayan sa Talisay nga ipahigayon ugmang adlawa.
Pagauloha'g "Balik Baroto ug Layag Na Ta," ang kompetisyon nahanduraw pag-usab sa Organizing Committee sa pagpangulo ni Dir. David 'Kuya Boy' S. Odilao Jr. aron mapaila ang mga paningkamot, sakripisyo, abilidad ug kapabilidad sa marginal Cebuano fishermen samtang naglawig kini sa kadagatan sakay sa ilang "Barotos" ug "Layag" nga maoy paagi sa ilang transportasyon.
Giabagan sab si Odilao ni Capitol Consultant sa Peace and Order ug Head of Cebu Provincial Anti-Illegal Fishing.
Sila si Col. Romeo O. Tapayan, PN (Ret.), Cebu United Eagles Club President Dr. Edilberto 'Kuya Bert' Alvarado ug broadcaster Robert 'Bobby Knight' Inoferio maoy mipadagan ning maong kalihukan.
Mokabat ngadto sa P150,000 ang gitaganang ganti alang sa mga top finishers.
Gawas sa tropeyo, ang kampiyon modawat og P50,000, mopahiluna sa ikaduha makaangkon og P40,000, samtang ang ikatulo mobulsa og P30,000. Ang mo-ukopar sa ikaupat ug ikalima nga dapit makadawat og P20,000 ug P10,000 matag usa.
Ang tanang mga partisipante gawas lang sa top three finishers, adunay kahigayonan nga modaog og 10 ka bag-ong "Barotos" nga ripahon atol sa awarding ceremony.
Ang registration gitakda karong adlawa didto sa Talisay fishport. Dungan usab kini sa inspection sa "Barotos" kun makapasar ba kini alang sa lumba pinasubay sa mga "specifications" nga gihatag sa mga tigpasiugda.
Ang kalihukan gipaluyohan sa Probinsiya sa Sugbu ubos sa liderato ni Gov. Hilario P. Davide III ug ingon man sa League of Municipalities of the Philippines (LMP)-Cebu Chapter pinaagi sa ilang Presidente ug Tuburan Mayor Democrito 'Aljun' Diamante Jr. ug sa dakbayan sa Talisay ubos ni Mayor Johnny V. de los Reyes. (BANAT PALARO)