Roncal milansang 50 puntos kadaugan sa Alcover

 CEBU, Philippines - Wala'y nakapugong sa kainit  kaayong duwa ni Randyll Roncal dihang mirehistro siya'g game-high 50 puntos sa kadaugan sa team Alcover batok sa team Abella, 109-107 sa As-Es (B.A.R.) First Conference basketball tournament didto sa Benjamin Solon Memorial Gym sa Cogon Ramos, ning siyudad sa Sugbu.

 Ang kanhi commercial cager nga si Roncal nakakuha sab og suporta gikan ni former CAAA MVP Gerald Ylaya, kinsa mitimbre'g 27 puntos alang sa team Alcover nga nakalingkawas sa kabangis sa team Abella.

 Miabag sab si John Raboy sa kadaugan sa team Alcover pinaagi sa pag-iskor og 10 puntos.

 Unom ka players sa team Abella ang miiskor og double figures sa pagpangulo nilang John Rupero ug Romero Deliña nga mikimada og 17 puntos matag usa.

 Si Samuel Sasing mitikdol og 16 puntos, si  Ariel Llanos mitimang og 15 puntos, samtang sila si  Rey Miñoza ug Henry Sabal  miariya'g 14  ug 11 puntos  matag  usa, apan wala mosalir ang ilang mga paningkamot  kay napakyas sila pagkulit og daog. (BANAT NEWS)

 PUNTOS MATAG USA

 TEAM ALCOVER (109) – Roncal  50, Ylaya  27, Raboy 10, Capoy  6, Piñas  6,  Villarba 5,  Alcover   4,  Aliñabon  4, Du 3.

 TEAM ABELLA (107) – Rupero 17, Deliña 17, Sasing 16, Llanos 15, Miñoza 14, Sabal 11, Al. Abella 5, Tancio 4, Ferrer 4, Ab. Abella 2.