CEBU, Philippines - Mo-host na sab og laing extreme sporting event ang lungsod sa Liloan pinaagi sa pagpahigayon sa Summer Wake Jam Competition karong adlawa didto sa Cebu Wakepark sa Papakit's Marina and Fishing Lagoon.
Dili pa lang dugay, ang lungsod sa Liloan nipahigayon og off-road triathlon.
Dul-an sa 30 ka wakeboarders dinhi sa Sugbu ang gipaabot nga mopakita'g aksiyon. Mosalmot sab ang top contenders gikan sa host Cebu Wakepark ug Danasan Wake Park.
Ang mga pambato sa Cebu Wakepark naglakip ni kanhi motocross rider Ian Reyes, Eric Quijote, Warren Pasasadaba, Lloyd Ventolero, Joel Ala, Amador Pilapil, Jess Boquiren, Kim Diola, Waks Alcaraz, Helmut Estremos ug Matt Salt.
Ang mga partisipante bahinon ngadto sa tulo ka nagkalain-laing events ug categories nga naglakip sa wakeboarding ug wakeskate event alang sa beginners ug advanced class, samtang ang kneeboarding adunay open category.
Molingkod isip hurado sa maong kalihukan mao ang duha ka foreign elite wakeboarders nga silang Chris O'shea ug Mitch Langfield.