CEBU, Philippines - Mipatigbabaw si NM Merben Roque sa ilang duwa batok ni Glenn Pardillo aron masakmit ang titulo sa 3rd Marcelo 'Loloy' Ruelan Memorial Open Chess Tournament niadtong weekend didto sa Deep Blue Chess Club sa SM City-Cebu.
Si Roque midaog ni Pardillo human sa 43 ka duso sa Sicilian Dragon aron maghari sa 7-round Swiss system competition nga adunay 6.5 puntos.
Ang managsuong Rommel ug Ronald Ganzon parehong miiskor og 6.0 puntos paghuman sa duha ka adlaw nga kompetisyon, apan si Rommel maoy miangkon sa ikaduhang dapit pinaagi sa higher tie-break output.
Si Roque mibulsa og P5,000 isip ganti sa iyang kadaugan, samtang si Rommel nakadawat og P3,000 ug si Ronald nakaangkon og P1,000.
Nagsolo sa ikaupat nga dapit si Anthony Makinano nga adunay 5.5 puntos. Mokompleto sa top 10 finishers mao silang Edsel Montoya, Andrew Casiano,Felix Shawn Balbona, Glenn Pardillo, NM Rogelio Enriquez ug NM Arnold Cadiz.
Gidumala uban sa Cebu Executives and Professionals Chess Association (CEPCA), ang tinuig nga kompetisyon nagmalampuson pinaagi sa suporta nilang Ethi Dominguito, Atty. Jose Mariano Tan, Dr. Darcy Tabotabo, Atty. Gaudioso 'Jongjong'
Melendez, Atty. Ben Harayo, ABC President Wilfredo M. Diamante, Andrew Aznar ug Cepcans Jun Olis ug Boy Pestaño.