2nd Lou Ornopia cagefest sugdan karong adlawa
CEBU, Philippines - Ang gikahinaman nga 2nd Brgy. Capt. Lou Ornopia basketball tournament pormal nang sugdan karong adlawa didto sa Calambua open court sa San Remigio sa amihanang bahin sa lalawigan sa Sugbu.
Pormal sab nga sugdan sa defending champion Olkas Calambua ang ilang kampanya pagpanalipod sa ilang korona.
Ang Olkas Calambua gipaabot nga makasugat og lisud nga hagit gikan sa uban mga koponan sama sa Brgy. Ilihan, San Miguel ug Don Gregorio Antigua-Bagtic.
Ang upat ka team nga palig-onan sa ilang imports mosubay og double-round robin format. Ang top two qualifiers makabaton og "twice-to-beat" incentives sa crossover semifinals. Ang mga modaog maoy magsangka sa "best-of-three" finals.
Sa dili pa ang duwa, usa ka yano nga opening ceremony ang ipahigayon sa ala-1 sa hapon. Pagatambongan kini ni Provincial Board Member Joven Mondigo ug Vice Mayor Al Pestolante.
Lain pang molamas sa opening salvo mao ang pagpili og "best muse" ug "best in uniform."
Mokabat ngadto sa P50,000 ang giandam nga ganti alang sa mga mananaog nga koponan diin ang kampiyon mobulsa og P20,000. Ang outstanding achievers sama sa MVP ug Mythical Five makadawat og cash incentives inig human sa maong torneyo.
Ang usa ka bulan nga kompetisyon nga gipresentar sa MS Motosuit gipaluyohan sab sa F&FO Motor Parts, JCO Motor Parts, Prospeed, Speed-up, Motomaze, Keiz BJ Motors, Bradder Moto Access, RMO Motor Parts and N Style.
Gisuportahan sab kini nilang Congressman Benhur Salimbangon, Provincial Board Members Sun Shimura ug Joven Mondigo, Vice Mayor Al Pestolante, SB Member Rizmar de la Peña, Ramon Montealto, Leizel ug Diosdado Navarez, Renan Bocado, Lucy Comtemplado, Dr. Andy Uy ug Sanitic Services.
- Latest
