CEBU, Philippines - Makabaton na sab og higayon ang aspiring Cebuano hoopsters pagbaid sa ilang abilidad sa basketbol pinaagi sa Online Basketball Training Camp sugod sa Abril 1 diha sa Cebu Eastern College (CEC) gym.
Ang first level nga molungtad og usa ka buwan, himuon sa matag adlaw gikan sa alas-8 hangtod sa alas-11 sa buntag.
Pagadumalaon kini ni training director ug former PBA cager Mark Tallo, kinsa mao karon ang assistant coach sa Southwestern University (SWU) Cobras.
Si Tallo, kinsa mao sab ang team consultant sa CEC Dragons miingon nga ang Online camp motudlo sa mga partisipante og proper dribbling, footwork, defense, one-on-one moves, rules of the game ug uban pang mga aspeto sa sports.
Ang Online cage clinic nakabunga na og mga dekalibreng magduduwa nga niduwa sa major amateur ug developmental leagues sa nasud sama sa Cebu Schools Athletic Foundation Inc. (CESAFI), National Collegiate Athletic Association (NCAA), Universities Athletic Association of the Philippines (UAAP), Philippine Collegiate Champions League (PCCL) ug Jr. NBA.
Sa registration fee nga P1,200, ang mga partisipante makadawat og upper uniform ug basketball.
Alang sa dugang mga detalye sa maong Online camp, mahimong mobisita ni Mr. Maraat sa CEC o motawag sa 0915-4294695. (BANAT NEWS)