CEBU, Philippines - Ang mga boksidor sa Bago City ug ALA Boxing Gym ang nidominar sa PLDT-ABAP Visayas Area Boxing Championship niadtong Domingo didto sa Maasin City gymnasium.
Ang Bago ug ALA parehong mitapos sa torneyo uban ang tulo ka gold medal, usa ka silver ug usa ka bronze medals.
May kahigayonan unta nga masolo sa ALA Gym ang overall title, apan napilde ni Jasper Montano sa Bago City ang ALA boxer nga si Vicente Casido sa boys' lightweight division hinungdan nga nagtabla ang duha sa gold medal tally.
Laing gold medalist sa Bago City mao sila si Cresan Paul Diacamos, kinsa mipilde ni Junrel Jimenez sa Team Cebu sa flyweight class, Mario Jaga nga mi-TKO ni Marlon Samblaceno sa Maasin City.
Midaog gikan sa ALA Gym mao sila si Jeffrey Estella (bantamweight), Kenneth Paul Gentallan (flyweight), Kevin Jake Cataraja (bantamweight).
Naka- gold sa Cebu City mao sila si Marco Pomar (light flyweight), Kit Garces (bantamweight). Sila si Jimenez, Joerje Edusma (bantamweight) ug Marvin Pomar (pinweight) ang mitunol og silver alang sa Cebu City.
Ang host nga Maasin midaog og gold gikan ni Romie Evale (pinweight), tulo ka silver ug unom ka bronze medals. (BANAT PALARO)