Madala ba kaha sa ring
Kun atong tuohan ang uwahing naka-sparring ni Manny Pacquiao nga si Lydell Rhodes, gamay na lang ang trabahuon ni coach Freddie Roach aron mabalik na sa top shape ang gitawag og 'Pacman' sa boxing ring.
Ang undefeated nga si Rhodes giingong kaparehas og estilo ni Timothy Bradley, gani mas maayo pa daw itandi sa ika-rematch ni Pacquiao karong Abril 12.
Matud pa sa report sa Philstar, si Rhodes miingon nga wala siya mag-expect nga mas kondisyon kuno si Pacquiao kay sa iyang gilauman. Maayo kini nga senyales.
Si Pacquiao miingon nga buotan ra kaayo siya sa una nilang sangka ni Bradley. Napilde si Pacquiao niadtong higayona, apan ang desisyon gikuwestiyon maong hilaw ang kadaugan ni Bradley. Si Pacquiao nag-concert pa nianang pagkagabii samtang si Bradley nalandig sa tambalanan.
Kun aduna may gipangayo karon ang mga boxing fans, kini mao ang 'karaang Manny' kadtong klasi sa Manny nga "uhaw" sa ibabaw sa ring nga nagpusot-pusot ang kumo nga wala diri-wala didto.
Misaad man hinuon si Pacquiao nga karong higayona dili niya lung-an si Bradley. Walay duda kaya kini ni Pacquiao, apan ang dakung pangutana kun iyaha ba gyud kining mahimo inig saka na niya sa ring ilabi na kun iyang ma-recall ang pagkangilngig nga KO nga gipatilaw kaniya ni Juan Manuel Marquez.
* * *
Kagabii nagsangka ang Philippine Azkals sa usa ka friendly match batok sa Malaysian Tigers didto sa Kuala Lumpur, Malaysia.
Gustong i-aplay sa Pilipinas ang bag-o nilang sistema nga buot ipatuman sa ilang bag-ong coach nga si Thomas Dooley. Si Dooley beterano na sa FIFA World Cup, nagpasabot kini nga duna siya'y nahibaw-ang game plays ug daku kini kaayo'g ikatabang unya sa kampanya sa Pilipinas.
Duha ka higayon nang nag-abot ang Malaysia ug Pilipinas niadtong 2012, una sa Rizal Stadium nga miresulta sa 1-1 draw. Sa ikaduhang higayon, 0-0 didto sa Kuala Lumpur.
Ubos pa kadto sa pagtimon ni German coach nga si Michael Weiss nga maoy nagdala sa Pilipinas sa posisyon o world ranking niini karon sa FIFA nga ika 127th ug naggiya sa Azkals nga mo-qualify sa kinatas-ang naabot karon sa Philippine Football, ang Asian Football Confederation Challenge Cup sa Maldives sa bulan sa Mayo ning tuiga.
Kun makakuha og maayong standing ang Pilipinas sa AFC Challenge Cup, daku ang purohan niining makaapil sa World Cup. Para nako, bisan maka-qualify lang sa maong prestihiyosong torneyo daku na kaayo kining kalampusan sa Pilipinas sa natad sa football.
Karong Marso 5, ang Azkals moduwa na sab og usa ka "friendly match" didto sa Dubai diin ilang sangkaon ang Azerbaijan, kinsa nabutang sa ika-93 sa ranking. Masukod og maayo sa mga Pinoy ang kalidad sa European-style football gikan sa maong nasud.
* * *
PAGTULON-AN: "A good leader need not talk about what he contributes. It should be the members doing this for him." – Anonymous
- Latest
