CEBU, Philippines - Usa lang gihapon ka Mehikanong boksidor nga si Fernando 'Enano' Aguilar maoy bag-ong kontra ni WBO international junior bantamweight 'King' Arthur Villanueva sa supporting bout sa "Pinoy Pride XXIV: The Future is Now" karong Sabado didto sa Solaire Resort and Casino sa Parañaque City.
Si Aguilar maoy moilis ni Mexican rising star Juan Hernandez nga maoy orihinal nga kontra ni Villanueva, apan dili na makaaway human maaksidente sa motorsiklo didto sa Mexico.
Hinuon, bisan og dili kaayo kuyaw iyang kontra, ang undefeated ALA Boxing Gym stalwart dili gihapon kini mokompiyansa ug iya gihapon nga iladlad ang tanan niyang hinagiban atol sa away.
"We cannot take this guy (Aguilar) lightly because even if he is a last minute replacement he still poses threat to Villanueva," matud pa ni ALA Promotions Vice President Dennis Cañete.
Si Villanueva nagbitbit og 23-0, 13KOs nga rekord, samtang si Aguilar adunay 9-6, 1KO.
Ang maong fight card gibidahan ni Genesis 'Azukal' Servania (23-0, 9KOs) nga moharong ni former Venezuelan world champion Alexander 'El Explosivo' Muñoz (36-5, 28KOs) sa ilang WBO Intercontinental junior featherweight showdown.
Laing undefeated ALA Gym fighter nga si super bantamweight prospect 'Prince' Albert Pagara (18-0, 12KOs) makigsangka usab ni Isack Junior (22-4, 8KOs). (BANAT NEWS)