CEBU, Philippines - Igo na lang sa paglingo-lingo ang mga magduduwa sa City Assessor's Office tungod kay wala sila makapugong depensa paghuramentado ni Mayor Mike Rama gikan sa three-point arc.
Mipataroy og 25 ka three-pointers si Rama sa kinatibuk-an niyang 77 puntos aron timonan ang Mayor's Office pag-iskor og
144-76 nga kadaugan sa nagpadayong Cebu City Hall Inter-Department basketball tournament niadtong Lunes didto sa San Nicolas gym.
Ang makabungog nga kadaugan nagduso sa Mayor's Office ngadto sa semifinal round nga sugdan sunod semana.
Sama sa eliminasyon, naglaum si Mayor's Office coach Charlie Reyes nga ila sab maharos ang semis aron moabante sa finals.
Si kanhi UV Lancer Rene Toring ug si kanhi CIT Wildcat Emilio Aniñon miamot og 18 puntos matag usa. Tulo ka players ang
miiskor og double figures sa kapildihan sa Assessor's Office. (BANAT NEWS)