CEBU, Philippines - Sa labing unang higayon, usa ka langyaw'ng koponan mosalmot sa Thirsty Cup, ang labing daku ug malambuong football tournament dinhi sa Sugbu.
Atol sa press conference kagahapon, si Niel Montesclaros, usa sa founding organizers sa kalihukan miingon nga usa ka
piniling koponan gikan sa South Korea ubos sa ERCO-BRO Koreans ang mopakita'g aksiyon sa tinuig nga football festival nga gikatakda
karong Pebrero 21-23 diha sa Cebu City Sports Center (CCSC).
Ang South Koreans, kinsa moduwa sa men's open ug boys under-20 division, usa lamang sa 20 ka koponan gikan sa nagkalain-
laing dapit sa nasud ang mopakita'g aksiyon ning tulo ka adlaw nga torneyo nga karon anaa na sa ika-11 nga season.
Gilauman sab nga mosalmot mao ang Global Elite sa Manila. Lain pang "out-of-town" nga mga koponan nga mopakita'g aksiyon
naglakip sa Les Lions, San Carlos FC ug DCCCO-ARDORE FC nga pulos gikan sa San Carlos City, Blue Monkey FC, Kachella FC ug
Silliman FC gikan sa Dumaguete, Davao Crocodile, Ladies Knight FC ug Ateneo de Davao sa Davao City, Tubigon FC sa Bohol, Andres
Bonifacio FC sa Dipolog, Xavier Crusaders FC sa Cagayan de Oro, PFC, Baybay FC ug Visayas State University (VSU) Varsity sa Leyte,
Talisay Minulu-uan FC sa Negros Occidental ug go! Hermie FC sa Oroquieta City. Ang Tacloban nga labing naapektohan sa bagyong
Yolanda mopadala sab og koponan pinaagi sa STEFTI FI.
Mga kategoriya nga tigian mao ang mixed U7, U9, U11, boys U13, boys and girls U15, U18 ug U20, 35-above ug ang premiere
men's ug women's open. (BANAT NEWS)