CEBU, Philippines - Walay nangahas pagbabag sa tinguha sa Pimentel Brokers ug walay mibarog batok kanila sa finals aron sakmiton ang labing una nilang titulo sa 7th FYA-Philip Zafra Cup basketball tournament.
Ang Pimentel milubong sa Simple Likes Resto Bar sa iskor nga 97-79 sa knockout finals niadtong Lunes sa gabii didto sa barangay Tisa gym.
Sa sayo pa, naangkon sa D&L Sportswear ang ikatulong pwesto human ilang gipukan ang Angel Mary Pawnshop sa iskor nga 120-110.
Silang Ryan Villaver ug Takli Abella maoy nangu sa D&L sa ilang 29 ug 24 puntos matag usa, samtang sila si AJ Abella ug Dondon Cadungog nagkumboya'g 26 puntos. Ang Angel Mary gipangulohan ni McLean Alkuino, kinsa miposa og 19 puntos, gisundan ni Reniel Lim nga adunay 18 puntos.
Sa laing bahin, si Dexter Caballero maoy leading scorer sa Pimentel pinaagi sa iyang 26 puntos nga igo na kaayo alang kaniya aron ilhon nga MVP. Miamot og 21 puntos si Nico Laborte, samtang sila si JR Reyes ug Janus Abellana nagkumboya'g 26 puntos.
May buynas nga miduyog sa Pimentel tungod kay ilang napugngan ngadto lang sa singko puntos ang tirador sa Simple Likes nga si Noel Medalle ug ang ilang 15 puntos sa fourth quarter maoy nagtukmod sa Simple Likes ngadto sa bung-aw sa kaparotan.
Silang Lito Mirasol, Ryan Dacayana ug Victor Lastomen maoy miabaga sa scoring alang sa Simple Likes nga parehong mihimo'g double figures.
Si Jim Rara sa Angel Mary Pawnshop maoy nakadawat sa Sportsmanship Award.
PUNTOS MATAG USA
Unang duwa:
D&L Sportswear (120) - Villamor 29, T. Abella 24, AJ Abella 15, Cadungog 11, Parba 6, Pacaña 6, Torres 6, Dacayana 4, Trangia 3, Batuto 2.
Angel Mary (110) - Alkuino 19, Lim 18, Bermudez 15. Rara 12, Ramirez 11, Baguio 10, Parba 8, Dumaguit 7, Jabonero 7, Cajocson 4,Sydiongco 2, Pardenilla 2.
Ikaduhang duwa:
Pimentel Brokers (97) - Caballero 26, Laborte 21, Reyes 14, Abellana 12, Bahina 7, Malicay 6, Noquillo 4, Boysello 3, Sombilon 2, Aglipa 2.
Simple Likes (79) - Mirasol 14, Dacayana 13, Lastomen 10, Canceko 8, Abella 8, Medalle 5, Cabaron 5, Regudo 4, Sabalande 3, Sarsaba 3, Zapanta 2, Baricuatro 2.