Game no. 1 sa PBA finals

CEBU, Philippines - Magyampungad na sab atubangan sa  telebisyon ang PBA fans sa pagsugod sa Philippine Cup "best-of-seven" finals series tali sa Rain or Shine Elasto Painters ug San Mig Coffee Mixers.

 Human sa makutas nga   kadaugan sa Game-7 sa semis batok sa igsuon nilang koponan   Barangay Ginebra San Miguel, ang San Mig makigsangka sa Rain or Shine sa Game-1 sa ilang "best-of-seven" series didto sa Smart Araneta Coliseum.

 Ang titular showdown sugdan sa alas-8 sa gabii didto sa Smart Araneta Coliseum.

 Maisip nga 'rematch'  ang duwa sa duha tungod kay sila man sab ang nag-abot sa finals sa 2012 Commissioner’s Cup  diin midaog ang Painters sa Game-7.

 Hinuon, lahi ning higayona  kay walay import ang matag koponan ug bugtong ang mga local stars lang ang modiskarte.

 Si Rain or Shine coach Yeng Guiao nagkanayon nga bisan og napilde na nila sa finals ang San Mig niadtong 2012, mas gutom sila ilabi na nga kini maoy labing una nilang All-Filipino Cup title kun modaog.

 Kun sa kondisyon ang hisgutan,  mas nakapabor ang Rain or Shine tungod kay sayo nilang gidispatsar  ang Petron Blaze Boosters sa semis, 4-1, itandi sa San Mig nga misangko pa sa Game-7 una nila tagaka ang Ginebra.

 Si San Mig coach Tim Cone miingon nga wala maluya ang iyang mga players ug mas ganado hinuon kini ilabi nga kampiyonato na.

 Gawas ni James Yap, andam na usab sa laing lisud nga serye ang ubang key players sa San Mig sama nila ni Peter Jun Simon, Mark Pingris, Mark Barroca ug Joe Devance.

 Atbangan kini sa puwersa nilang  Paul Lee, Jeff Chan, Ryan Araña ug  sa tandem nila ni Beau Belga ug Cebuano center JR Quinahan. (BANAT PALARO)