CEBU, Philippines - Andam na ang tanan alang sa pagpahigayon sa 2014 Central Visayas Regional Athletic Association (CVIRAA) Meet karong Domingo diha sa Cebu City Sports Center (CCSC).
Mao kini ang unang pagbalik sa CVIRAA dinhi sa Sugbu sukad niadtong 2000.
Ang tinuig nga kompetisyon gitakda unta niadtong Nobiyembre, apan gisibog human sa 7.2 magnitude nga linog nga miigo sa Cebu ug Bohol.
Naapektohan usab ang CVIRAA sa super typhoon Yolanda nga mikuso-kuso sa Visayas region niadtong Nobiyembre 8 sa miaging tuig.
"The response from all divisions is very surprising considering the calamities that hit our region. Grabe gyud ilang support gipakita sa atua. We are able to reach our usual number of delegates,†matud pa ni Physical Education and School Sports (PESS)-7 chief
Vivian Giñete atol sa news conference kagahapon didto sa DepEd-Cebu City division office.
Kapin sa 10,000 ka atleta, coaches ug officials ang mosalmot ning usa ka semanang developmental sports tournament alang sa mga school-based athletes.
Pangulohan kini sa Cebu City nga adunay 476 ka atleta, uban sa Bohol Province (459), Tagbilaran City (356), Bogo (220), Cebu Province (482), Bais (202), Bayawan (234), Carcar (255), Danao (255), Dumaguete (373), Guilhulngan (186), Lapu-Lapu (440), Mandaue (500), Naga (211), Negros Oriental (416), Siquijor (174), Talisay (323), Tanjay (210) ug Toledo (140).
Ang mga atleta magtigi sa mga sporting events sama sa arnis, tennis, table tennis, basketball, football, taekwondo, sepak takraw, wrestling, wushu, swimming, futsal, billiards, gymnastics ug volleyball.
Ang top performers sa CVIRAA Meet maoy morepresentar sa rehiyon sa Palarong Pambansa nga gikatakda sa Mayo didto sa Laguna.