Sinulog Cup mosikad karon
CEBU, Philippines - Mag-abot na usab karon ang mga banggiitang collegiate teams sa Sugbo alang sa pagbukas sa 2014 Cebu City Mayor’s Sinulog Cup Inter-Collegiate Basketball Tournament didto sa Cebu Coliseum.
Ang torneyo unang gitakdang sugdan sa Enero 23, apan ang mga organizers napugos pagsibug sa petsa sa maong event human ang mga players sa University of San Carlos (USC) Warriors mitambong una og importanteng scholastic activity.
Gawas sa USC Warriors, laing musalmot mao ang University of San Jose-Recoletos (USJ-R) Jaguars, apan mas atangan sa maong torneyo ang panagharung pag-usab sa magkaribal nga University of the Visayas (UV) Green Lancers ug Southwestern University (USC) Cobras.
Sa unang adlaw, ang USC moduwa batok sa USJ-R sa alas-5:30 sa hapon, sundan sa main-game tali sa UV ug SWU sa alas-7:30 sa gabii.
Dili lang ang korona ang ilogan sa mga koponan, apan lakip na usab ang P50,000 grand prize. Ang runner-up mudawat og P30,000, samtang ang third ug fourth placer sa torneyo adunay P15,000 ug P5,000 matag usa.
Ang torneyo musunod og single round robin format, diin ang duha ka top seed teams moabante sa championship round.
Ang mga tickets sa Cebu City Sports Commission (CCSC)-sponsored event nagkantidad og P30 sa upperbox, P50 sa lower box ug P100 alang general admission. (BANAT SPORTS)
- Latest
