CEBU, Philippines - Nailog sa Oklahoma City Thunder ang unang puwesto sa Western Conference human ilang gipukan ang host San Antonio Spurs, 111-105 kagahapon didto sa AT&T Center sa San Antonio, Texas.
Gipangulohan gihapon ni Kevin Durant ang kadaugan pinaagi sa iyang 36 puntos.
Mao na kadto ang ikatulong daog sa Thunder batok sa Spurs karon nga season.
Ang beteranong si Tony Parker mao sab ang nangu sa Spurs nga mikulit og season-high 37 puntos. Silang Tim Duncan ug Boris Diaw miamot og 14 puntos matag usa alang sa Spurs, kinsa mitugyan sa unang puwesto sa West human sa ilang kapildihan.
Ang Thunder kasamtangang nagsolo sa Western sa ilang 33-10, samtang ang Spurs adunay 32-10.
Si Marco Belinelli miamot og 13 puntos ug si Manu Ginobili miabuno'g 10 puntos alang sa Spurs nga naglisud sa ilang depensa tungod kay napiang ang ilang top defensive stopper nga si Kawhi Leonard atol sa maong duwa.
Miiskor sab og double-figure si Reggie Jackson alang sa Thunder pinaagi sa iyang 27 puntos, samtang si Serge Ibaka midugang og 14 puntos.
Wala kaayo makahugyo si Durant dihang didto pa sa sulod sa korte ang 6-foot-7 nga si Leonard. Mibiya si Leonard sa uwahing bahin sa second period human mapiang ang iyang tuong kamot ug wala pay kasiguroan kun kanus-a siya mobalik og duwa. Wala sab makaduwa silang Danny Green ug Tiago Splitter alang sa Spurs.
Upat ka lead changes ug unom ka tabla ang nahitabo sa third quarter, apan wala na molabaw ang Spurs sa fourth period.
Sa laing mga duwa, ang Phoenix Suns milubong sa Indiana Pacers, 124-100, napilde sa Charlotte Bobcats ang Los Angeles Clippers, 95-91, gipakuratan sa Toronto Raptors ang Dallas Mavericks, 93-85 pinaagi sa career-high 40 puntos ni DeMar DeRozan.
Ang Boston Celtics nangayo pa'g overtime una nila maangkon ang kadaugan batok sa Washington Wizards, 113-111, ang Chicago Bulls misungag sa Cleveland Cavaliers 98-87.
Gibihag sa Atlanta Hawks ang Orlando Magic, 112-109, ang Philadelphia Sixers mipilde sa New York Knicks, 110-106 ug ang Milwaukee Bucks mipilde sa Detroit Pistons sa iskor nga 104-101. (BANAT PALARO)