Sinukmagay sa Sinulog
CEBU, Philippines - Ang ALA Boxing Gym fighter nga si Rolando 'Momoy' Servania (5-0, 1KO) manalipod sa limpyo niyang rekord sa iyang pakigsangka ni Dingdong 'The Fantasy Warrior' Quiñones (3-7, 1KO) sa main event sa ALA Boxing and Fitness Gym’s "Sinulog Boxing at the Mall" karong gabii diha sa Gaisano Countrymall carpark sa Brgy. Banilad, ning siyudad.
Sila si Servania ug Quiñones magsangka sud sa unom ka hugna ubos sa bantamweight division.
Si Servania, ang manghod ni reigning WBO Intercontinental super bantamweight champion Genesis 'Azukal' Servania midaog sa katapusan niyang away pinaagi sa pagkulata ni Marlon Macaya sud sa unom ka rounds niadtong Disyembre 10 didto sa Bacolod Bay Center sa Bacolod City.
Miaway usab siya sa miaging tuig sa Sinulog boxing diin midaog kini sa iyang pro debut batok ni Joyjoy Formentera pinaagi sa unanimous decision.
Gawas sa Servania-Quiñones showdown, atngan usab ang away ni kanhi Cuban amateur standout Reymi Castellano Aleye (2-0, 1KO) nga makigsinukliay og kumo batok ni Rodel Wenceslao (7-6, 2KOs) sa Mandaue City.
Si Jonas Sultan moharong ni Marlon Macaya, samtang si Jess Rhey Waminal mosukod sab sa abilidad ni Jerome Baja.
Laing walo ka away sa amateur fighters ang masaksihan sa undercard sa maong boxing event nga libre sa tanan. (BANAT NEWS)
- Latest
