CEBU, Philippines - Duha ka korona ang nalangkat sa ERCO FC pinaagi sa premiere men's open ug inter-company division atol sa ikaduhang adlaw sa 4th Sinulog Football Festival niadtong Domingo sa duha ka managlahing binyu sa barangay Subangdaku, dakbayan sa Mandaue.
Ang ERCO FC Team B miugkat sa titulo sa premiere men's open dihang ilang gisirohan ang Tabor Hills, 2-0 sa finals didto sa Aboitiz Sports Field. Samtang ang ERCO FC misakmit sa ilang ikaduhang titulo sa inter-company division batok sa Leylam FC, 3-2 didto sa San Roque Parish football field.
Sa sangka sa inter-BPO, ang Convergys miiskor og daog batok sa Lexmark, 2-0, samtang ang Kevlar-Queen City United mihimo'g 1-0 nga kadaugan batok sa San Roque Football Club aron maangkon ang korona sa above-38 division.
Sa pikas bahin, ang University of San Carlos (USC) miiskor sab og 1-0 nga kadaugan batok sa San Roque Football Club sa female division.
Lain pang misakmit og korona ning torneyo nga gipaluyohan sa Super Metro mao ang Dynamo FC sa under-15, Phoenix FC sa girls'1 18, Talisay Razkals sa under-9 class, Lahug FC nga naghari sa under-11 division ug ang Sacred Heart School-Ateneo de Cebu nga nidominar sa under-13 ug under-15 categories.