Sinulog is in the air! Bisan pa man sa kanunay nga paghabo-habo sa atong kalangitan dinala sa "low pressure area" ug hanging amihan, wala magpalupig ang debosyon sa mga tawo ngadto sa Balaang Bata, Senyor Sto. Niño tungod sa kadaghan gihapon sa mga pilgrims nga atong makita.
Dunay giluto karon nga balaudnon sa usa ka kongresista nga nagtinguhang i-exempt sa tibuok niyang kinabuhi ang atong Pambansang Kamao nga si Manny Pacquiao.
Ambot kun unsay nakaon aning Valenzuela City Rep. Magtanggol Gunigundo nga miduso man og susamang balaudnon. Akong tan-aw dili ni makiangayon sa tanan, asa na man ang equality niini?
Well, sa pagkatinuod daghan ang mi-idolo ni Pacquiao, apan wala seguro ni magpasabot nga mouyon ang iyang mga fans niini.
Kun hatagan og "exemption" si Pacquiao ug ang uban pang mga atleta, mura'g "unfair" man seguro ni alang sa ubang mga Pinoy nga mihimo usab sa ilang makaya aron mahatagan og dungog ang nasud.
Nganong di na lang nato i-exempt ang mga sundalo, ang mga polis, ang mga bombero, ug uban pang naghatag usab kanato og dakung dungog pinaagi sa pagbutang sa ilang kinabuhi alang sa kaayohan sa kinabag-an?
Ang maong balaudnon gitawag nga House Bill 3521 o Pacquiao Act of 2013 ug ang tumong daw niini mao ang paghatag kuno'g exemption sa mga atleta nga makahatag og dakung dungog sa Pilipinas.
Migawas kining maong balaudnon tunga-tunga niining isyu kabahin sa tax evasion nga gipasaka sa Bureau of Internal Revenue batok sa paboritong boksidor sa Pilipinas.
* * *
Migawas karon ang pangalan ni American Joseph Robert 'The Ghost' Guerrero (31-18-2) nga mas maayong maoy makaatbang ni Manny 'Pacman' Pacquiao nga mas maoy pilion ni Freddie Roach nungka sa magsukol-dagan nga si Timothy Bradley.
May katarungan gyud hinuon si Roach, kay si Guerrero wala man mapatumba ni Floyd Mayweather Jr. sa labing uwahi nilang sangka niadtong Mayo 2013.
Kun mapatikangkang siya ni Pacquiao , mosamot gyud og kakusog ang panawagan alang sa Pacquiao –Mayweather "megafight."
Atong hinumduman nga dihang gikasangka ni Mayweather ang British brawler nga si Ricky Hatton, milanat kini og siyam ka rounds, apan dihang si Pacquiao maoy nakaatbang, gipakatulog lang kini sa ikatulong rounds.
Imagine, kun unsay reaksyon ni Mayweather? Apan pwede gihapong moingon siya nga aw, ako na man nang gipilde daan.
Kinahanglang pakatulgon gyud ni Pacquiao si Bradley sa ilang "rematch" aron sa ingon, si Mayweather, di na makapangita pa og laing rason.
Kay si Juan Manuel Marquez, otro man sab tong mitalaw, di na man gyud siya makigsangka ni Pacquiao, si Bradley na lang maoy kinahanglang idispatsar.
Ang negosasyon madali na lang, ilabi na kun kwarta na maoy molihok ug ang mga promoters sama ni Bob Arum posible mang mohimo og "milagro" aron mahinayon ang maong sangka.
* * *
PagtulOn-an: A good head and a good heart is always a formidable combination -- Nelson Mandela
* * *